Вербніца

ВЕРБНІЦА, Вербная, Пальмавая нядзёля, апошняя перад Вялікаднём нядзеля, зь якою было зьвязана асьвячэньне ў храмах галінак вярбы, што служыла аберагальным i прадукавальным сродкам. У некаторых мясьцінах Гарадзенскай губерні яшчэ ў XIX ст. на вербніцу прывозілі ў цэрквы вярбу цэлымі дрэвамі з карэньнямі й пасьля асьвячэньня ламалі зь яе галіны. Гістарычныя вытокі вербніцы верагодна паходзяць ад паганскіх часоў, кaлi продкамі ўшаноўваўся культ зеляніны, што зьвязвалася з прыходам вясны й распусканьнем першага дрэва. У хрысьціянстве гэты дзень прымяркоўваецца да Уваходу Icyca Хрыста ў Ерусалім, дзе народ сустракаў яго пальмавымі галінкамі.